काठमाडौँ, १३ फागुन २०८२ (२५ फेब्रुअरी २०२६, बुधबार)-रुसको सर्वोच्च अदालतले अमेरिकी बहुराष्ट्रिय प्रविधि कम्पनी गुगलमाथि लगाइएको अकल्पनीय १.२ क्विन्टिलियन युरोको विशाल जरिवाना सदर गरेको छ। यो जरिवाना रकम सम्पूर्ण विश्वको कुल गार्हस्थ्य उत्पादन (जीडीपी) भन्दा कैयौं गुणाले बढी हो। गुगलको भिडियो प्लेटफर्म युट्युबले रुसी सरकार समर्थित सञ्चारमाध्यमहरूका च्यानलहरूमाथि प्रतिबन्ध लगाएपछि सुरु भएको यो कानुनी विवादले अहिले विश्वकै सबैभन्दा ठूलो जरिवानाको रूप लिएको हो। सुरुमा रुसी अदालतले गुगललाई ती च्यानलहरू पुनः सञ्चालनमा नल्याए दैनिक जरिवाना तिर्नुपर्ने र उक्त रकम हरेक हप्ता दोब्बर हुँदै जाने फैसला सुनाएको थियो। निरन्तरको यसै गणितीय वृद्धिका कारण जरिवाना रकम बढेर पृथ्वीमा उपलब्ध कुल सम्पत्तिभन्दा पनि धेरै पुगेको हो।
रुसले युक्रेनमाथि आक्रमण सुरु गरेपछि गुगलले आफ्ना अधिकांश रुसी सेवाहरू बन्द गरिसकेको छ भने गुगलको रुसी शाखाले यसअघि नै आफूलाई टाट पल्टेको (देवालिया) घोषणा गरिसकेको छ। यस्तो अवस्थामा पनि रुसी सर्वोच्च अदालतले गुगलको पुनरावेदनलाई खारेज गर्दै यो असीमित जरिवाना तिर्नैपर्ने अन्तिम फैसला सुनाएको हो। विश्वको कुल अर्थतन्त्र करिब सय ट्रिलियन डलरको हाराहारीमा रहेको र गुगलको आफ्नो बजार मूल्य दुई ट्रिलियन डलर मात्र रहेको अवस्थामा रुसले यो जरिवाना असुल गर्न सक्ने सम्भावना भने लगभग शून्य रहेको आर्थिक विश्लेषकहरूले औंल्याएका छन्। यस घटनालाई विश्वव्यापी प्रविधि कम्पनी र राज्यसत्ताबीचको अहिलेसम्मकै सबैभन्दा अनौठो र प्रतीकात्मक कानुनी लडाइँका रूपमा हेरिएको छ।