तेहरान, १७ फागुन २०८२ (१ मार्च २०२६, आइतबार)– इरानका सर्वोच्च नेता आयतोल्लाह अली खामेनीको अमेरिका र इजरायलको संयुक्त हवाई आक्रमणमा मृत्यु भएको छ। शनिबार तेहरानस्थित कडा सुरक्षा घेराभित्र रहेको उहाँको निवासलाई लक्षित गरी गरिएको भीषण बमबारीमा ८६ वर्षीय खामेनीको ज्यान गएको हो। आइतबार बिहान इरानको सरकारी टेलिभिजन र आधिकारिक समाचार एजेन्सीले यस घटनाको औपचारिक पुष्टि गरेका छन्। यस लक्षित आक्रमणले समग्र मध्यपूर्वलाई ठूलो क्षेत्रीय युद्धको संघारमा पुर्याएको छ।
यस शक्तिशाली आक्रमणमा सर्वोच्च नेता खामेनीका साथै उहाँकी छोरी, ज्वाइँ, नाति र इरानको शक्तिशाली रिभोलुसनरी गार्ड (IRGC) का उच्च पदस्थ सुरक्षा अधिकारीहरूको समेत ज्यान गएको इरानी सञ्चारमाध्यमले जनाएका छन्। यस कारबाहीको नेतृत्व गरेका अमेरिकी राष्ट्रपति डोनाल्ड ट्रम्पले सामाजिक सञ्जालमार्फत खामेनीको मृत्युको घोषणा गर्दै यसलाई ‘इरानी जनता र विश्वभरका पीडितहरूका लागि न्याय’ भनेका छन्। ट्रम्पले यो घटनालाई इरानी जनताले आफ्नो देश फिर्ता लिने सबैभन्दा ठूलो अवसर भन्दै इजरायलका प्रधानमन्त्री बेन्जामिन नेतन्याहुसँगको सहकार्यमा यो अपरेसन सफल भएको दाबी गरेका छन्।
आफ्ना सर्वोच्च नेताको हत्यापछि इरान सरकारले देशभर ४० दिनको राष्ट्रिय शोक र ७ दिनको सार्वजनिक बिदा घोषणा गरेको छ। इरानका राष्ट्रपति मसुद पेजेस्कियन र रिभोलुसनरी गार्डले यस हत्याको कठोर र विनाशकारी बदला लिने चेतावनी दिएका छन्। यसैको जवाफस्वरूप इरानले शनिबार रातिदेखि नै इजरायलका विभिन्न सहरहरू र मध्यपूर्वका इराक तथा बहराइनलगायतका देशमा रहेका अमेरिकी सैन्य अखडाहरूमा सयौँ ब्यालेस्टिक मिसाइल र ड्रोन प्रहार गर्न सुरु गरिसकेको छ।
सन् १९८९ देखि लगातार ३६ वर्षसम्म इरानको एकछत्र सत्ता सम्हाल्दै आएका खामेनीको कुनै स्पष्ट उत्तराधिकारी नतोकिएकाले इरानमा अहिले ठूलो राजनीतिक शून्यता सिर्जना भएको छ। विश्लेषकहरूका अनुसार अब इरानको सत्ता पूर्ण रूपमा रिभोलुसनरी गार्डको नियन्त्रणमा जाने सम्भावना बढेको छ। यस घटनापछि समग्र मध्यपूर्वको सुरक्षा अवस्था अत्यन्तै तनावपूर्ण बनेको छ भने विश्वभरका मुलुकहरूले आफ्ना नागरिकलाई उक्त क्षेत्रको भ्रमण नगर्न र सुरक्षित रहन कडा एड्भाइजरी जारी गरेका छन्।