फागुन २३, २०८२, काठमाडौं – प्रतिनिधि सभा निर्वाचन २०८२ को अन्तिम मत परिणाम अनुसार काठमाडौं क्षेत्र नम्बर ३ बाट राष्ट्रिय स्वतन्त्र पार्टी (रास्वपा) का उम्मेदवार राजुनाथ पाण्डे विजयी हुनुभएको छ। उहाँले १८ हजार ७५७ मत प्राप्त गर्दै आफ्ना निकटतम प्रतिस्पर्धी उज्यालो नेपाल पार्टीका अध्यक्ष कुलमान घिसिङलाई ७ हजार ५८६ मतको फराकिलो अन्तरले पराजित गर्नुभएको हो। घिसिङले ११ हजार १७१ मत प्राप्त गर्दा नेपाली कांग्रेसका रमेश अर्यालले ६ हजार र नेकपा (एमाले) का रामेश्वर फुयालले ३ हजार ८ सय १६ मतमा सीमित हुनुभयो। यस सानदार जितसँगै पाण्डेले काठमाडौं-३ मा रास्वपाको बलियो उपस्थिति दर्ज गराउनुभएको छ।
५५ वर्षीय राजुनाथ पाण्डे काठमाडौं महानगरपालिकाको नगर प्रहरीका पूर्व प्रमुख हुनुहुन्छ। सुशासन र कानुनी शासनलाई प्रमुख चुनावी एजेन्डा बनाउँदै महानगर प्रहरी प्रमुखको पदबाट राजीनामा दिएर प्रत्यक्ष राजनीतिमा होमिनुभएका उहाँ रास्वपामा वरिष्ठ नेता बालेन्द्र शाह (बालेन) निकट मानिनुहुन्छ। त्रिभुवन विश्वविद्यालयबाट स्नातकोत्तर तहको अध्ययन पूरा गर्नुभएका र लामो समय सुरक्षा तथा प्रशासनिक क्षेत्रमा अनुभव सँगाल्नुभएका पाण्डेलाई यसपटक स्थानीय मतदाताले ठूलो विश्वास र भरोसाका साथ संसद्मा पठाएका छन्।